•  Merita Zenelaj
•   17 Prill, 2024

Forumi Rajonal për Mbrojtjen Shoqërore për Europën, që po zhvillohet në Porto të Portugalisë, vlerësoi Institutin e Sigurimeve Shoqërore me katër “Certifikata Merite” për ofrimin e shërbimeve online.

Në ceremoninë e posaçme, ku mori pjesë Drejtori i Përgjithshëm i ISSH-së, z. Astrit Hado, programi për mbrojtjen e veçantë për gratë e papuna me tre apo më shumë fëmijë të mitur, për të cilat shteti mbulon kontributet e sigurimeve shoqërore u vlerësua me çmimin “Certifikatë e Meritës me Përmendje të Veçantë” nga Komisioni Teknik i ISSA-s dhe Juria e pavarur ndërkombëtare e Konkursit “ISSA Good Practice Award  Europe 2024”.

Instituti i Sigurimeve Shoqërore u vlerësua gjithashtu me “Certifikata Merite” edhe për 3 praktika:

• Dixhitalizimi i arkivës së sigurimeve shoqërore;
• Përmirësimi i përfitimeve të sigurimeve shoqërore, nëpërmjet raporteve elektronike mjekësore ( e-Raporte);
• Si dhe për të gjitha shërbimet e tjera të ofruara online.

Shqipëria arriti të dallonte me shërbimet e saj në garën mes 40 institucioneve të sigurimeve mes 26 shteteve, pjesë e Rrjetit Europian të ISSA-s dhe 119 praktikave.

Qëllimi i këtij konkursi ishte prezantimi dhe vlerësimi i institucioneve që kanë në fokus përmirësimin e shërbimeve ndaj qytetarëve.

Shqipëria, tashmë renditet mes atyre vendeve që me efikasitet po zbaton një reformë të plotë digjitalizimi dhe për të cilën edhe Instituti i Sigurimeve Shoqërore po punon me profesionalizëm në rritjen e mëtejshme të cilësisë dhe arritjen e standardeve europiane.

•  Merita Zenelaj
•   14 Qershor, 2024

Instituti i Sigurimeve Shoqërore zhvilloi sot në datë 13 qershor 2024, mbledhjen e parë të Këshillit Administrativ për këtë vit.

Me votim unanim, Zëvendësministrja e Ekonomisë, Kulturës dhe Inovacionit, znj.Olta Manjani u zgjodh Kryetare e këtij Këshilli.

Ndër të tjerash, Këshilli miratoi edhe projektvendimin “Për miratimin e koeficientit të indeksimit të bazës së vlerësuar të vitit 2022, për llogaritjen e pensioneve”.

Ky projektvendim, i cili pritet të kalojë për miratim edhe në Këshillin e Ministrave, do të krijojë mundësinë e rivlerësimit të pagës mesatare mbi të cilën llogaritet shuma mujore fillestare e pensionit, për të gjithë personat që do të marrin pension nga data 01 korrik 2024 e në vazhdim.

Koeficienti, parashikohet të ndikojë në rritjen e bazës së vlerësuar për mbi 20 mijë persona, duke bërë të mundur që pensionet e tyre të jenë të harmonizuara me kontributet e derdhura.

•  Merita Zenelaj
•   10 Korrik, 2024

Këshilli Administrativ i ISSH-së, zhvilloi në datë 9 korrik 2024, mbledhjen e tij të radhës, nën drejtimin e Zëvendësministres së Ekonomisë, Kulturës dhe  Inovacionit, znj. Olta Manjani.

Gjatë kësaj mbledhjeje u morën disa vendime, ku më kryesori ishte ai i miratimit të rezultatit financiar për vitin 2023.

Të ardhurat  e drejtpërdrejta nga kontributet e personave juridikë dhe fizikë, si dhe të ardhurat e tjera të Fondit të Sigurimeve Shoqërore, në vitin 2023 arritën në rreth 124.6 miliardë lekë, me realizim 100 %, kundrejt planit.

Gjatë fjalës së tij, Drejtori i Përgjithshëm i ISSH-së, z. Astrit Hado, theksoi se performanca financiare ka rezultuar tejet pozitive, duke konfirmuar jo vetëm mirëadministrimin, por edhe punën e bërë në drejtim të ruajtjes së programuar të shpenzimeve dhe realizimin, sipas programit buxhetit të miratuar nga Kuvendi.

Instituti i Sigurimeve Shoqërore mbetet i angazhuar për të rritur më tej të ardhurat kontributive, për të përmirësuar cilësinë e shërbimeve për qytetarët, si dhe për të zbatuar politikat reformatore të Qeverisë në fushën  e pensioneve.

•  Merita Zenelaj
•   4 Shtator, 2024

•  Merita Zenelaj
•   16 Tetor, 2024

Duke marrë shkas nga transmetimi i emisionit investigativ “Stop” në TV Klan të një rasti abuzimi me pensionistët për njohjen e vjetërsisë në punë në Drejtorinë Rajonale të Sigurimeve Shoqërore Durrës, Instituti i Sigurimeve Shoqërore menjëherë pasi u njoh me rastin dhe bëri verifikimet paraprake bën me dije se për punonjësit pranë DRSSH Durrës është marrë masa “Largim nga puna”. Në ditët në vijim do të kryhen të gjitha verifikimet dhe veprimet proceduriale nëse ka persona të tjerë të implikuar në këtë rast.

ISSH distancohet nga çdo veprim individual që cënon rëndë Kushtetutën, Kodin Penal, Civil, Administrativ, çdo ligj tjetër në fuqi dhe Kodin e Etikës, e mbi të gjitha që cënojnë integritetin dhe imazhin e institucioneve të administratës publike.

Gjithashtu, garantojmë qytetarët se NUK do të ketë ASNJË TOLERANCË për ASNJË PUNONJËS që SHKEL LIGJIN, që CËNON TË DREJTËN e qytetarëve për të gëzuar të drejtat e tyre, marrjen e shërbimeve falas në përputhje me ligjet në fuqi.

‼️Inkurajojmë çdo qytetar të denoncojë pranë Institutit të Sigurimeve Shoqërore përmes kanaleve tona zyrtare, raste të tjera të ngjashme apo abuzime me të drejtat tuaja apo të afërmve tuaj.

🌐https://www.issh.gov.al/?page_id=11975

Çdo denoncim do të trajtohet me seriozitet maksimal dhe në përputhje të plotë me ligjet në fuqi. Transparenca dhe llogaridhënia janë parimet tona udhëheqëse, dhe së bashku do të garantojmë mbrojtjen e të drejtave tuaja!

•  Merita Zenelaj
•   5 Mars, 2025

Instituti i Sigurimeve Shoqërore zhvilloi në datë 4 mars analizën vjetore për vitin 2024, ku mori pjesë edhe zëvendësministrja e Ekonomisë, Kulturës dhe Inovacionit, znj. Olta Manjani.

ISSH vijon të ketë një performancë pozitive të të ardhurave, duke rikonfirmuar qëndrueshmëri dhe konsolidim fiskal.

Gjatë fjalës së saj, znj. Manjani e vuri theksin tek rritja e cilësisë së shërbimeve që ISSH ofron krahas rritjes së numrit të pensionistëve, tek sfida për rritjen e numrit të kontribuesve në sasi dhe cilësi, si dhe tek qëndrueshmëria e skemës së sigurimeve shoqërore, si objektiva madhorë të qeverisë shqiptare per vitin 2025.

Nga ana e tij, Drejtori i Përgjithshëm i ISSH-së z. Astrit Hado, tha se të ardhurat në total nga kontributet e sigurimeve shoqërore për vitin 2024 u realizuan në masën 139.4 miliardë lekë ose 102 %, me një tejkalim prej 2 miliardë lekë, në krahasim me planin.

Numri i kontribuesve për vitin 2024, është 844 mijë persona, me një rritje prej 2%, në krahasim me vitin 2023.

Sistemi i sigurimeve shoqërore e mbylli vitin 2024 me një rezultat fiskal pozitiv me rreth 2.3 miliardë lekë, nga të cilat 2.1 miliardë lekë vijnë nga tejkalimi i të ardhurave, pjesa tjetër vjen nga mosrealizimi i shpenzimeve, prej 0.2 miliardë lekë.

Rritja e të ardhurave, kryesisht për shkak të rritjes së pagave, ka ndikuar në uljen e deficitit të degës së pensioneve, i cili vazhdon të jetë nën vlerën 1 % të PBB-së.

Gjatë vitit 2024, numri i aplikimeve online të përpunuara arriti në 402,502 aplikime, pa përfshirë ato shërbime që përfitohen automatikisht nga sistemi e-Albania. Në këtë mënyrë qytetarët kanë arritur të marrin më shumë shërbime, me cilësi dhe në kohë reale.

Drejtori i Përgjithshëm i ISSH-së, z. Astrit Hado, nënvizoi gjithashtu edhe rëndësinë e rritjes së besimit të qytetarëve ndaj skemës, rritjen e transparencës, si dhe kërkoi angazhim të shtuar të strukturave për të bërë të mundur  rritjen e numrit të kontribuesve dhe të të ardhurave.

Instituti i Sigurimeve Shoqërore edhe gjatë vitit 2025 mbetet i angazhuar të vijojë punën për rritjen e cilësisë së shërbimit ndaj qytetarëve, për uljen e kohës së caktimit të pensioneve, për lehtësimin e procedurave të transferimit të pensioneve në qendrat paguese, si dhe për realizimin e programit të të ardhurave të Fondit të Sigurimeve Shoqërore.

Në bashkëpunim me Bankën Botërore, Ministrinë e Ekonomisë, Kulturës e Inovacionit dhe Ministrinë e Financave, po punohet për reformimin e sistemit të sigurimeve shoqërore në funksion të perspektivës afatgjatë të sistemit dhe në funksion të ndryshimeve demografike, duke patur në qendër të vëmendjes rritjen e të ardhurave të pensionistëve, punë e cila ka filluar qysh në vitin 2024, nëpërmjet dhënies së bonuseve të fundvitit, e cila këtë vit u dha në masën 15 mijë lekë dhe 10 mijë lekë, në varësi të të ardhurave të pensionistëve. Dhënia e bonuseve për pensionistët do të vijojë edhe për vitin 2025, sipas parashikimeve përkatëse buxhetore.