Drejtori i Përgjithshëm i Institutit të Sigurimeve Shoqërore, z. Astrit Hado, zhvilloi një takim me Administratoren e Postës Shqiptare sha, znj. Anisa Kaltanji, dhe Drejtorët e Filialeve Rajonale.
Forcimi i mëtejshëm i bashkëpunimit, si dhe ofrimi i shërbimeve cilësore dhe me standarde, në kuadër kjo edhe të Reformës Digjitale që po zbatohet, ishin në fokus të këtij takimi.
ISSH vlerëson Postën Shqiptare sha si një partner të qendrueshëm dhe të dy institucionet janë duke intensifikuar përpjekjet për të nisur një epokë të re në ofrimin e shërbimeve, me fokus të veçantë pensionistët, strategji e cila do të shoqërohet edhe me hartimin e një marrëveshje të re kuadër.
Z. Hado konfirmoi vullnetin e plotë të ISSH-së për t’iu përgjigjur të gjitha sfidave, në kuadër të zhvillimit të teknologjisë, si dhe për të ofruar zgjidhje efikase për çdo problematikë që mund të haset nga qytetarët.
Sfida jonë e përbashkët është krijimi i Kartës Universale Sociale, që do të sjellë një transformim në marrjen e shërbimeve për pensionistët, si një kategori me kontribut të veçantë për zhvillimin e vendit.
Shqipëria dhe Kosova negociuan marrëveshjen administrative në fushën e sigurimeve shoqërore, pas ratifikimit nga ana e Parlamenteve respektivë.
Raundi i tretë i bisedimeve mes dy delegacioneve për hartimin e kësaj Marrëveshjeje dhe elementëve teknikë të zbatimit u zhvilluan në datat 23-24 Maj 2022, në Tiranë.
Delegacioni shqiptar u kryesua nga Zëvendësministri i Financave dhe Ekonomisë z. Besart Kadia, ndërsa bisedimet u udhëhoqën nga Drejtori i Përgjithshëm i Institutit të Sigurimeve Shoqërore z. Astrit Hado.
Për palën kosovare negociatat u kryesuan nga znj. Leunora Zulfiaj, Udhëheqëse e Divizionit të Punës në Ministrinë e Financave, Punës dhe Transfereve.
Të dyja palët, në përfundim të negociatave, shprehën vullnetin e plotë për të thelluar më tej bashkëpunimin, si dhe për të koordinuar skemat e sigurimeve shoqërore, në përputhje me standardet e legjislacionit europian.
Objekt i kësaj Marrëveshje janë përfitimet nga skema shqiptare e detyrueshme e sigurimeve shoqërore, të cilat përfshijnë:
përfitimet në para për barrë-lindje për personat e punësuar;
personat e vetëpunësuar, si dhe për punëdhënësit;
përfitimet në para për aksidentet në punë dhe sëmundjet profesionale për personat e punësuar;
për pensionin e pleqërisë, të invaliditetit dhe familjar, për personat e punësuar dhe të vetëpunësuarit, si dhe për punëdhënësit.
Kjo marrëveshje është tepër e rëndësishme, pasi garanton të drejta të barabarta dhe siguron mbrojtje shoqërore për qytetarët që jetojnë në të dy vendet tona.
Drejtori i Përgjithshëm i Institutit të Sigurimeve Shoqërore, z. Astrit Hado mori pjesë në Konferencën Kombëtare për Antikorrupsionin, në panelin: “Rritja e transparencës dhe efektivitetit të administratës publike: Përdorimi i mjeteve digjitale për të përmirësuar ofrimin e shërbimeve për qytetarët”.
Gjatë fjalës së tij z. Hado tha se fokusi i punës sonë është automatizimi i proceseve në mënyrë që qytetarët të marrin shërbimet në kohë reale dhe me cilësi.
Në periudhën 2020-2022 janë kryer në total 538,749 aplikime, ku vetëm për periudhën janar-maj 2022 janë realizuar 125,457 aplikime.
Instituti i Sigurimeve Shoqërore ofron 56 shërbime përmes platformës e-Albania dhe për shumicën e tyre përgjigjja merret online. Ky revolucion ka sjellë thjeshtësim të procedurave, standartizim të aplikimeve, eliminim të një sërë dokumenteve, por edhe shërbim më të mirë e më të shpejtë.
Drejtori i Përgjithshëm i ISSH-së, theksoi se e gjithë kjo, nuk do të ishte bërë e mundur pa ndërveprimin midis institucioneve, rritjen e ndërgjegjësimit dhe edukimit të qytetarëve, monitorimin efikas të të gjithë proceseve, si dhe rritjen e mëtejshme të transparencës.
Një rol të rëndësishëm në zbatimin e kësaj reforme madhore kanë edhe burimet njerëzore, që çdo ditë aftësohen për të garantuar ecurinë e procesit dhe me profesionalizëm trajtojnë e zgjidhin çdo problematikë që mund të lindë.
Instituti i Sigurimeve Shoqërore do të vijojë të jetë i angazhuar për të adresuar drejt sfidat dhe për të përmbushur objektivat që dikton teknologjia digjitale.
Instituti i Sigurimeve Shoqërore në bashkëpunim me Organizatën Ndërkombëtare të Punës, ILO dhe Shoqatën Ndërkombëtare të Sigurimeve Shoqërore, ISSA, po zhvillojnë nga data 4-6 Korrik, një sesion trajnimesh me përfaqësues të DRSSH-ve dhe ALSSH-ve, në lidhje me skemat e sigurimeve shoqërore, për kategorinë e të vetëpunësuarve në bujqësi.
Drejtori i Përgjithshëm i ISSH-së, z. Astrit Hado gjatë fjalës së tij falënderoi z. Kenichi Hirose, specialist i nivelit të lartë për Mbrojtjen Shoqërore pranë ILO, znj. Zhulieta Harasanin, koordinatore e ILO-s për Shqipërinë dhe z.Guillaume Filhon, funksionar i lartë i sigurimeve shoqërore, ISSA për mbështetjen e vazhdueshme që kanë dhënë në ofrimin e njohurive dhe praktikave më të mira në lidhje me këtë fushë.
“ Skemat e sigurimeve shoqërore veçanërisht për kategorinë e të vetëpunësuarve në bujqësi janë shumë të rëndësishme në aspektin social dhe ekonomik të vendit tonë. Për këtë, arsye trajnimi i vazhdueshëm i stafeve tona, në nivel rajonal, i shërben rritjes profesionale dhe ofrimit sa më të mirë të shërbimeve”, tha Drejtori i Përgjithshëm i ISSH-së.
Gjatë dy ditëve të trajnimit, pjesëmarrësit do të njihen me praktikat më të mira të përzgjedhura nga lektorët, për mënyrën e procedimit dhe të mbledhjes së kontributeve në sektorin e bujqësisë.
Instituti i Sigurimeve Shoqërore i kushton vëmendje të veçantë përmirësimit të aspekteve teknike dhe rregullatore të skemave të sigurimeve shoqërore, për të garantuar mbrojtjen e të drejtave, rritjen e bazës së kontribuesve, si dhe të të ardhurave.
Ratifikimi nga Kuvendi i Marrëveshjes për mbrojtjen shoqërore me Konfederatën e Zvicrës, i hap rrugën përfitimeve nga skemat e detyrueshme të sigurimeve shoqërore.
Përmes kësaj skeme qytetarët do të mund të përfitojnë: pensionin e pleqërisë, pensionin familjar dhe pensionin e invaliditetit.
Mbrojtja siguron dhe mbulon periudhat e pagesës së kontributeve ose periudhave të barasvlershme, të njohura nga ligjet e sejcilit prej dy shteteve.
Janë afërsisht 3,100 shtetas shqiptarë që jetojnë dhe punojnë në Zvicër, pa përfshirë shtetasit shqiptarë me nënshtetësi të dyfishtë, ndërsa në vendin tonë jetojnë rreth 53 shtetas zviceranë.
Në bazë të kësaj marrëveshje asnjë nga qytetarët nuk do të humbasë kontributet, pasi bashkimi i periudhave do të bëjë të mundur plotësimin e kushteve ligjore për përfitimin e pensionit në të dy vendet.
Instituti i Sigurimeve Shoqërore mbetet i angazhuar për të garantuar mbrojtjen shoqërore me vendet që ka një marrëveshje, ndërsa është duke u punuar për të shtuar marrëveshjet me shtetet e tjera, ku jetojnë dhe punojnë qytetarët shqiptarë.
Nën drejtimin e Kryetares, njëherazi dhe Ministre e Financave dhe Ekonomisë, znj. Delina Ibrahimaj, në datë 25 Korrik 2022 u zhvillua mbledhja e radhës e Këshillit Administrativ të Institutit të Sigurimeve Shoqërore.
Këshilli miratoi disa projekt-akte, që kanë të bëjnë me rregullime dhe qartësime për ecurinë e veprimtarisë së Komisionit Mjekësor të Caktimit të Aftësisë për Punë të Nivelit të Parë në Institutin e Sigurimeve Shoqërore, Drejtorisë së Inspektimit të Përfitimeve, etj.
Drejtori i Përgjithshëm i ISSH-së z. Astrit Hado, gjatë mbledhjes, konfirmoi edhe për 6-mujorin e parë të këtij viti qendrueshmërinë financiare, si dhe performancën pozitive të të ardhurave.
Nga ana tjetër z. Hado informoi Këshillin Administrativ se i gjithë sistemi i brendshëm elektronik i ISSH-së është në funksionim të plotë dhe se pagesat, përfshi edhe ato të pensioneve, janë realizuar në mënyrë të rregullt.
Instituti i Sigurimeve Shoqërore vijon të jetë i angazhuar për të realizuar objektivat, përmbushur të gjitha detyrimet, si dhe për mbarëvajtjen e shërbimeve.
Në mbledhjen e sotme të Këshillit të Ministrave u miratua Vendimi për indeksimin e të gjitha kategorive të pensioneve në Shqipëri në masën 6%, si pjesë e Paketës së Rezistencës Sociale 2.
Nga kjo masë do të përfitojnë rreth 670 mijë pensionistë, për të cilët indeksimi për të gjithë vitin 2022 llogaritet në masën 9.5%.
Për periudhën shtator-dhjetor 2022 zbatimi i kësaj mase ka një efekt në buxhetin e shtetit në rreth +2 miliardë lekë, ndërsa për vitin 2023 në +8.4 miliardë lekë.
Instituti i Sigurimeve Shoqërore, do të garantojë edhe përmes bashkëpunimit me Postën Shqiptare sha dhe Bankat e Nivelit të Dytë zbatimin e këtij Vendimi, me qëllim ofrimin e këtij shërbimi për të gjithë individët përfitues.
Në mënyrë më të detajuar ky Vendim parashikon:
1. Indeksohen në masën 6%:
a) pensionet e caktuara sipas ligjeve nr. 4171, datë 13.9.1966 “Për sigurimet shoqërore në Republikën Popullore të Shqipërisë”, nr. 4976, datë 29.6.1972 “Për pensionet e anëtarëve të kooperativave bujqësore në Republikën Popullore të Shqipërisë” dhe nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar;
b) pensionet sociale, të caktuara në përputhje me Ligjin nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar;
c) shtesës mujore, të përfituar me Vendimin nr. 326, datë 21.6.1993, të Këshillit të Ministrave, “Për kriteret e trajtimit të invalidëve të luftës kundër pushtuesve nazifashistë të popullit shqiptar”;
ç) pensioneve të caktuara me dekretin nr. 758, datë 1.2.1994, të Presidentit të Republikës, “Për një mbrojtje të veçantë të ushtarakut”;
d) shtesës mbi pension, të dhënë sipas nenit 33, të Ligjit nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar;
dh) shtesave mbi pension, të dhëna sipas neneve 38, 39 dhe 48, të Ligjit nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar, dhe nenit 24, të Ligjit nr. 4171, datë 13.6.1966, “Për sigurimet shoqërore në Republikën Popullore të Shqipërisë”;
e) pensioneve të caktuara dhe të rillogaritura me Ligjin nr. 10142, datë 15.5.2009, “Për sigurimin shoqëror suplementar të ushtarakëve të Forcave të Armatosura, të punonjësve të Policisë së Shtetit, të Gardës së Republikës, të Shërbimit Informativ të Shtetit, të Policisë së Burgjeve, të Policisë së Mbrojtjes nga Zjarri dhe të Shpëtimit dhe punonjësve të Shërbimit të Kontrollit të Brendshëm në Republikën e Shqipërisë”, të ndryshuar, me përjashtim të pensioneve të caktuara me nenin 21, të këtij Ligji;
ë) trajtimeve të veçanta financiare të familjeve të pilotëve fluturues, të caktuara sipas ligjeve nr. 8455, datë 4.2.1999, “Për një trajtim të veçantë të familjeve të pilotëve, që humbasin jetën në përmbushje të detyrës, gjatë fluturimit”, të ndryshuar, dhe nr. 9128, datë 29.07.2003, “Për një trajtim të veçantë financiar të pilotëve fluturues, në pension”, të ndryshuar;
f) trajtimeve të veçanta financiare të caktuara sipas Ligjit nr. 9361, datë 24.03.2005, “Për një trajtim të veçantë financiar të efektivave, oficerë dhe nënoficerë, lundrues të nëndetëseve dhe polumbarëve të forcave detare në pension”;
g) trajtimeve të veçanta financiare të punonjësve të minierave, të caktuara sipas Ligjit nr. 8685, datë 09.11.2000, “Për një trajtim të veçantë të punonjësve që kanë punuar në miniera në nëntokë”, të ndryshuar;
gj) pensioneve të pleqërisë të punonjësve të minierave, të caktuara me Ligjin nr. 150/2014, datë 6.11.2014, “Për pensionet e punonjësve që kanë punuar në miniera në nëntokë”;
h) trajtimeve të veçanta financiare të caktuara sipas Ligjit nr. 9179, datë 29.1.2004, “Për një trajtim të veçantë të punonjësve që kanë punuar në disa ndërmarrje të industrisë ushtarake”, i ndryshuar;
i) pensioneve suplementare të caktuara sipas Ligjit nr. 10139, datë 15.5.2009, “Për pensionet shtetërore suplementare të punonjësve të universiteteve, të shkollave të larta, Qendrës së Studimeve Albanologjike, Akademisë së Shkencave dhe të gjitha institucioneve të tjera kërkimore publike në Republikën e Shqipërisë, të cilët kanë tituj shkencorë”;
j) pensioneve suplementare të caktuara sipas Ligjit nr. 8097, datë 21.3.1996, “Për pensionet shtetërore suplementare të personave që kryejnë funksione kushtetuese dhe të punonjësve të shtetit”, të ndryshuar;
k) shpërblimit të caktuar sipas Ligjit nr. 7874, datë 17.11.1994 “Për Statusin e veteranit të luftës kundër pushtuesve nazifashistë të popullit Shqiptar”, të ndryshuar;
l) pensioneve shtetërore të posaçme të caktuara në përputhje me nenin nr. 5 të Ligjit nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar;
ll) përfitimeve të caktuara sipas ligjit nr. 29/2019 “Për trajtimin financiar suplementar të punonjësve që kanë punuar në miniera në nëntokë, të punonjësve të industrisë së naftës dhe të gazit dhe të punonjësve që kanë punuar në metalurgji”;
m) trajtimeve të veçanta financiare sipas nenit 5/1/a dhe 5/1/b të Ligjit 7703, datë 11.05.1993 “Për sigurimet shoqërore në Republikën e Shqipërisë”, të ndryshuar;
n) trajtim financiar sipas germës a pika 1 e nenit 10 të Ligjit 129/2021 “ Për statusin “ Fëmijë në përkujdesje të Republikës”.
2. Indeksimin, sipas përcaktimeve të pikës 1, të këtij Vendimi, e përfitojnë edhe pensionet që do të caktohen pas datës së hyrjes në fuqi të këtij vendimi e në vazhdim, me kusht që data e fillimit të pensionit të jetë deri në datën e hyrjes në fuqi të këtij vendimi, përfshirë edhe këtë datë.
3. Pensionet e plota të pleqërisë, pensionet e plota të invaliditetit dhe pensionet e plota familjare, të caktuara sipas dispozitave të Ligjit nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar, me përjashtim të pensioneve të caktuara në përputhje me paragrafin e katërt, të nenit 96, të këtij ligji, si dhe pensionet e pleqërisë të punonjësve të minierave në nëntokë, të caktuara me ligjin nr. 150/2014, që kanë datë fillimi të të drejtës deri më 31.12.2014, pas datës së hyrjes në fuqi të këtij vendimi, nuk do të jenë më pak se 15,822 (pesëmbëdhjetë mijë e tetëqind e njëzet e dy) lekë në muaj dhe më shumë se 31,644 (tridhjetë e një mijë e gjashtëqind e dyzet e katër) lekë në muaj.
4. Pensionet e plota të pleqërisë, pensionet e plota të invaliditetit dhe pensionet e plota familjare, të caktuara në përputhje me paragrafin e katërt, të nenit 96, të Ligjit nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar, me datë fillimi deri më 31.12.2014, pas datës së hyrjes në fuqi të këtij Lendimi nuk do të jenë më pak se 10,834 (dhjetëmijë e tetëqind e tridhjetë e katër) lekë në muaj, por jo më shumë se 15,822 (pesëmbëdhjetëmijë e tetëqind e njëzet e dy) lekë në muaj.
5. Pensionet e parakohshme, të caktuara sipas Ligjit nr. 10142, datë 15.5.2009, të ndryshuar, me datë fillimi nga data e hyrjes në fuqi të këtij vendimi e në vazhdim, nuk do të jenë më pak se 15,822 (pesëmbëdhjetëmijë e tetëqind e njëzet e dy) lekë në muaj.
6. Përfituesit e pensioneve, sipas Ligjeve nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar, nr. 4171, datë 13.9.1966 “Për sigurimet shoqërore në Republikën Popullore të Shqipërisë”. nr. 4976, datë 29.6.1972 “Për pensionet e anëtarëve të kooperativave bujqësore në Republikën Popullore të Shqipërisë” si dhe nr. 150/2014, datë 6.11.2014, të caktuara me datë të fillimit të pensionit deri më 31.12.2014, përfshi edhe këtë datë, përveç pensionit të indeksuar sipas pikës “1” të këtij vendimi, do të vazhdojnë të përfitojnë edhe kompensimet për të ardhura mujore minimale, në masën dhe kriteret e përcaktuara në vendimet e Këshillit të Ministrave nr. 401, datë 21.6.2006, “Për kompensimin e të ardhurave mujore të pensionistëve”; nr. 763, datë 27.12.2006, “Për kompensimin e të ardhurave mujore të pensioneve”; nr. 415, datë 27.4.2009, “Për rritjen e pensioneve”; nr. 474, datë 30.6.2010, “Për rritjen e pensioneve”, dhe nr. 17, datë 20.1.2007, “Për kompensimin e të ardhurave mujore të pensionistëve të fshatit”, në atë masë që i kanë përfituar deri në datën e hyrjes në fuqi të këtij vendimi.
7. Kompensimet për të ardhura mujore minimale, në masën dhe kriteret e përcaktuara në Vendimet e Këshillit të Ministrave nr. 401, datë 21.6.2006, “Për kompensimin e të ardhurave mujore të pensionistëve”; nr. 763, datë 27.12.2006, “Për kompensimin e të ardhurave mujore të pensioneve”; nr. 415, datë 27.4.2009, “Për rritjen e pensioneve”; dhe nr. 474, datë 30.6.2010, “Për rritjen e pensioneve”, do t’i marrin edhe ata persona që do të përfitojnë pensione të parakohshme sipas ligjit nr. 10142, datë 15.5.2009, me datë fillimi nga data e hyrjes në fuqi të këtij vendimi e në vazhdim, me kusht që shuma e pensionit mujor të parakohshëm plus kompensimin e të ardhurave të jetë deri në 17 472 (shtatëmbëdhjetë mijë e katëqind e shtatëdhjetë e dy) lekë në muaj.
8. Përfituesit e pensioneve, sipas pikës “1” germa “a”, “e”, “gj” të këtij Vendimi me datë fillimi të pensionit deri në 31.12.2014 dhe përfituesit e pensioneve të parakohshme sipas Ligjit nr. 10142, datë 15.5.2009, krahas pensionit dhe kompensimeve, sipas përcaktimeve në pikën 6 dhe 7 të këtij Vendimi do të marrin edhe kompensimet sipas masës dhe kritereve të përcaktuara në Vendimet e Këshillit të Ministrave nr. 138, datë 31.3.1994, “Për kompensimin e shpenzimeve nga ndryshimi i çmimit të energjisë elektrike dhe lëndëve djegëse”; nr. 471, datë 15.7.1996, “Për kompensimin nga ndryshimi i çmimit të bukës, vajgurit dhe gazit të lëngshëm”.
9. Përfituesit e pensionit familjar, përveç pensionit të caktuar sipas dispozitave të Ligjit nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar, do të marrin edhe kompensimet për të ardhurat dhe për ndryshimin e çmimeve, sipas kritereve te përcaktuara në Vendimet e Këshillit të Ministrave nr. 763, datë 27.12.2006, “Për kompensimin e të ardhurave mujore të pensioneve”; nr. 415, datë 27.4.2009, “Për rritjen e pensioneve”; nr. 474, datë 30.6.2010, “Për rritjen e pensioneve”, nr. 138, datë 31.3.1994, “Për kompensimin e shpenzimeve nga ndryshimi i çmimit të energjisë elektrike dhe lëndëve djegëse”; nr. 471, datë 15.7.1996, “Për kompensimin nga ndryshimi i çmimit të bukës, vajgurit dhe gazit të lëngshëm” dhe udhëzimeve në zbatim të tij, me kusht që pensioni që kishte apo i takonte mbajtësit të familjes të jetë llogaritur sipas dispozitave ligjore në fuqi deri në 31.12.2014.
10. Shuma bazë e pensionit e përcaktuar sipas pikës 2 të nenit nr. 32 të Ligjit nr. 7703, datë 11.5.1993, “Për sigurimet shoqërore në Republikën e Shqipërisë”, të ndryshuar, duke filluar nga data e hyrjes në fuqi të këtij Vendimi e në vazhdim të jetë 8 588 (tetë mijë e pesëqind e tetëdhjetë e tetë) lekë.
U zhvillua në Tiranë, në datat 21-22 shtator 2022, raundi i parë i negociatave mbi Marrëveshjen Kuadër për Sigurime Shoqërore ndërmjet delegacionit të Republikës së Shqipërisë dhe delegacionit të Republikës së Kroacisë.
Delegacioni shqiptar u kryesua nga Zëvendësministrja e Financave dhe Ekonomisë, znj. Olta Manjani me pjesëmarrjen edhe të Drejtorit të Institutit të Sigurimeve Shoqërore, z. Astrit Hado, ndërsa delegacioni kroat u kryesua nga Drejtoresha e Sistemit të Pensioneve, znj. Melita Čičak.
Të dyja palët shprehën dëshirën për të thelluar bashkëpunimin për finalizimin e një marrëveshjeje të plotë për koordinimin e skemave të sigurimeve shoqërore midis dy vendeve tona, në përputhje me standardet e legjislacionit evropian në fushën e sigurimeve.
Delegacionet bën një prezantim të skemave të sigurimeve shoqërore të dy vendeve dhe në përfundim krerët e grupeve të punës parafirmosën tekstin e Marrëveshjes Kuadër, i cili do t’iu paraqitet qeverive respektive.
Nga kjo marrëveshje parashikohet të përfitojnë rreth 3,000 shtetas shqiptarë, ndërsa i hapet rruga garantimit të mbrojtjes së të drejtave në fushën e sigurimeve shoqërore shtetasve të të dy vendeve.
Raundi i ardhshëm i negociatave do të zhvillohet në dhjetor, në Kroaci.
Nën drejtimin e Kryetares, njëherazi dhe Ministre e Financave dhe Ekonomisë, znj. Delina Ibrahimaj, në datë 29 shtator 2022 u zhvillua mbledhja e radhës e Këshillit Administrativ të Institutit të Sigurimeve Shoqërore.
Këshilli miratoi një sërë vendimesh, ku ndër të tjerash edhe rezultatin financiar pozitiv të ISSH për vitit 2021.
Gjatë mbledhjes, Drejtori i Përgjithshëm i ISSH-së, z. Astrit Hado, konfirmoi edhe një herë qendrueshmërinë financiare, si dhe performancën pozitive në grumbullimin e të ardhurave, tendencë e cila parashikohet të jetë e tillë edhe gjatë vitit të ardhshëm.
Drejtori i Përgjithshëm i Institutit të Sigurimeve Shoqërore, z. Astrit Hado, zhvilloi një takim me drejtorët e Drejtorive Rajonale të Sigurimeve Shoqërore.
Në qendër të diskutimeve ishte rritja e performancës për ofrimin e shërbimeve ndaj qytetarëve, në kuadër edhe të Reformës Digjitale.
Hado kërkoi angazhim të shtuar dhe më shumë përgjegjësi në ushtrimin e detyrave funksionale, si dhe marrjen e masave të mëtejshme përsa i takon zbatimit të planit të kursimit të energjisë, që po zbatohet nga të gjitha institucionet qendrore dhe lokale.
Vëmendje, Drejtori i Përgjithshëm i ISSH-së kërkoi edhe në lidhje me informimin dhe ndërgjegjësimin për rritjen e kontributeve vullnetare, dhe në mënyrë të veçantë për të vetëpunësuarit në bujqësi, me qëllim zgjerimin e bazës së përfshirjes në skemë, të kësaj kategorie.
Instituti i Sigurimeve Shoqërore mbetet i angazhuar për t’i ofruar të gjithë qytetarëve një shërbim sa më cilësor, si dhe për të tejkaluar çdo problematikë me të cilën ata mund të hasen.
